Финска ќе воведе задолжителни тестови за коронавирус и карантин за патници од одредени земји со висок ризик, рече надлежниот министер во понеделникот, откако 24 од 157 патници кои пристигнале од Скопје биле позитивни на КОВИД-19.
Доброволното тестирање било организирано на аеродромот Турку во Финска во саботата за сите патници кои пристигнале на летот од Скопје, откако властите откриле дека два главни извори на последните нови инфекции со коронавирус во Финска биле летови од Македонија и Букурешт од Романија, рече министерот за семејни работи и за социјални услуги Криста Киуру пред новинарите.
„Епидемијата е на Балканот“, рече Киуру осврнувајќи се на неодамнешното скромно покачување на бројот на инфицирани во Финска.
Задолжителен двонеделен карантин и можен случаен тест за коронавирус по пристигнувањето во Финска ќе се применуваат за секој што ќе пристигне од земја со повеќе од 8 до 10 нови случаи на КОВИД-19 на 100.000 жители во последниот 14-дневен период, соопштија властите.
Во моментов, правилото важи за повеќето земји, со исклучок на 25 земји како што се Италија, Јапонија, Грција и Норвешка каде инфекциите остануваат ниски.
Минатата недела, бројот на инфицирани во Финска беше 2 до 3 на 100,000 жители во текот на 7 дена, со вкупно 7.601 случаи и 333 смртни случаи потврдени до понеделник. (Ројтерс)
