Дестабилизацијата на цената на нафтата на берзите не се очекува да предизвика нов ценовен бран во Македонија, смета извршниот директор на Стопанска комора, Антони Пешев. Според него и да има зголемување на вредноста на нафтата, тоа нема многу да влијае врз цената на храната во земјава. Причина за тоа се поразителните информации дека земјава изминативе години повеќе увезува храна, отколку што има домашно производство.
„За разлика од минатите бранови, ако конкретно ме прашувате за државните резерви во САД, кои се највисоко ниво. Тоа значи дека имаме една промена. Македонија одамна го следи ритамот на пазарите во светот. Ионака, храната се повеќе и повеќе доаѓа од надвор. Македонија има се помалку производство, а се повеќе увоз на храна. Ако се работи за увоз на храна, тогаш ние ќе ја делиме судбината со регионот. Мислам дека за оваа работа, новата Влада ќе треба да направи доста.“
Инаку, после Ковид кризата и воениот конфликт во Украина, цените на храната Македонија забрзано растат. Показател за тоа е што трошоците за живот на едно просечно семејство за само 4 месеци е зголемено за 50 евра. Тоа во реалноста значи дека на едно четиричлено семејство, да може најскромно да го „протурка“ месецот, сега му се потребни 60.000 денари.
