Собраниската комисија за мандатно-имунитетни прашања со четири гласа „за“ и четири гласа „против“ не изгласа да му предложи на Собранието да му се симне пратеничкиот имунитет на Трајко Вељаноски, за кого судија на претходна постапка побара притвор.
Резултатот од гласањето беше 4 спрема 4. Во моментот на гласањето не беше присутен пратеникот од ДУИ, односно од владеачкото мнозинство, Агим Шаќири.
Претседателот на Комисијата, Павле Богоевски, рече дека иако не е донесен конкретен став, тоа не значи дека барањето е одбиено.
-Тоа не значи дека е одбиено и не значи дека се препорачува негово прифаќање. Оваа тема на расправа ќе биде пренесена за одлучување на пленарната седница како што секогаш се прави – рече Богоевски.
Најави дека ова прашање ќе биде пренесено за одлучување на пленарната седница на Собранието кога ќе се одлучи за имунитетот на Вељаноски за што се потребни 61 глас.
Расправата за одземање на пратеничкиот имунитет на Вељаноски изминатите два дена помина во жестока дебата меѓу пратениците од опозицијата и парламентарното мнозинство. Со реплики, контрареплики и паузи, пратениците се расправаа околу оправданоста да му се одземе пратеничкиот имунитет на Вељаноски.
Извештајот од Комисијата треба да биде испратен до претседателот на Собранието.
Вељаноски е еден од шестмината осмничени во истрагата на Јавното обвинителство за нарачателите на насилниот упад во Собранието на 27 април 2017 година.
Покрај поранешниот претседател на Собранието, осомничени се и поранешниот премиер Никола Груевски, разузнавачот Никола Бошкоски, ексминистрите Миле Јанакиески и Спиро Ристовски како и ексдиректорот на УБК, Владимир Атанасовски.
