Во Шпанија почина уште едно лице од бактеријата листерија, која ја доби преку консумирање на заразено свинско месо, што е втор смртен случај од избувнувањето на епидемијата, изјави денеска портпаролот на Андалузискиот здравствен секретаријат Хозе Мигел Кисненос.
Според неговите зборови, починал 72-годишен маж кој бил во терминална фаза на рак на панкреас.
Листеријата може да биде особено опасна за лица со слаб имунитет и трудници.
Епидемија на листерија е прогласена во Андалузија на 15 август и досега се заразени 186 лица. Првата жртва беше 90-годишна жена.
Здравствените власти во Шпанија издадоа предупредување за целата земја.
Заразеното месо е произведено во компанијата „Магрудис“ од Севиља, пренесува „Ел Паис“.
Истовремено и Светската здравствена организација соопшти дека постои можност да се појават случаи на листерија и во други земји, доколку туристите јадат заразено свинско месо.
извор: Makfax