„Сите работиме на тоа војната против Украина да се стави крај со праведен и траен мир. Ги поздравуваме напорите на Соединетите Американски Држави и сум уверен дека овие напори ќе доведат до мир во Европа“, рече Руте на прес-конференција пред состанокот на министрите за надворешни работи на НАТО утре.
Претставникот на американскиот претседател Доналд Трамп, Стив Виткоф, и зетот на претседателот, Џаред Кушнер, се во Москва и се среќаваат со рускиот претседател Владимир Путин.
„Нема договор за членство на Украина во НАТО“
„Сакаме војната да заврши со суверена Украина и Русија никогаш повеќе да не може да ги нападне своите соседи“, нагласи генералниот секретар, додавајќи дека е извршена многу работа за „безбедносни гаранции“ за Украина.
На прашањето за оригиналниот план на САД од 28 точки, кој предвидува повлекување на Украина од членството во НАТО, Руте рече дека проширувањето на Алијансата бара консензус од земјите-членки и „сега нема консензус за Украина“.
Руте рече дека во последните месеци, европските и канадските сојузници обезбедиле милијарди долари за купување американска опрема и оружје за Украина. „Очекувам сојузниците да објават нови придонеси во наредните денови“, рече генералниот секретар.
Според иницијативата PURL (Список на приоритетни барања на Украина), преку која сојузниците на НАТО и другите партнери финансираат и организираат набавка на американско оружје, муниција и воена опрема за Украина, треба да се обезбедува една милијарда месечно.
Рубио не доаѓа на состанокот на НАТО
„На вистинскиот пат сме, започнавме во август со една милијарда месечно и досега се обезбедени четири милијарди. За следната година треба да обезбедиме и најмалку една милијарда месечно за купување основна опрема од САД“, рече Руте.
Министрите за надворешни работи на земјите од НАТО утре ќе разговараат за мировните напори за запирање на руската агресија врз Украина и зајакнувањето на одбранбените капацитети и одвраќањето.
Невообичаено е што американскиот државен секретар Марко Рубио нема да учествува на состанокот. „Не сакам да извлекувам никакви заклучоци од неговото отсуство“, рече Руте.
„Не се сеќавам на нешто слично во поновата историја“, изјави поранешната портпаролка на НАТО, Оана Лунгеску, истакнувајќи дека неговото отсуство би испратило погрешен сигнал, особено во време кога е потребна поблиска координација со европските сојузници за Украина.
Наместо Рубио, САД ќе ги претставува неговиот заменик Кристофер Ландау.
