Сирија и Израел водат разговори со посредство на САД за намалување на тензиите во јужна Сирија, при што Дамаск бара безбедносен договор што би можел да го отвори патот за пошироки политички разговори.
Дамаск пред два дена го обвини Израел дека испратил 60 војници на негова територија во близина на планината Хермон, кршејќи го сирискиот суверенитет.
Израелската војска одговори дека нејзините сили спровеле рутинска операција во јужна Сирија, но не и во Бејт Џин, област во близина на либанската граница и планината Хермон.
Сириското Министерство за надворешни работи вчера ги осуди најновите израелски напади, оценувајќи ги како директна закана за мирот и безбедноста во регионот.
Израел постојано ги оправдува своите воени интервенции во Сирија со безбедносни причини, особено по падот на претседателот Башар ал-Асад во декември минатата година, вклучително и обврската за заштита на припадниците на малцинството на Друзите, на југот од земјата.
Во јануари, израелскиот министер за одбрана Израел Кац изјави дека израелските трупи ќе останат на врвот на планината Хермон на неодредено време.
