Принцезата имала само 36 години кога загинала во сообраќајна несреќа во Париз на 31 август 1997 година, во која загинале и нејзиниот партнер Доди Фајед и возачот на автомобилот. Несреќата се случила кога автомобилот се превртел во тунелот Пон де л'Алма во француската престолнина.
Меѓу првите што пристигнале на местото на несреќата бил пожарникарот Хавиер Гурмелон, кој кога ја видел повредената жена немал поим која е. Тој вели дека не верувал дека русокосата на задното седиште е сериозно повредена бидејќи нејзините очи биле отворени, била свесна и можела да зборува.
„Додека сè уште беше во автомобилот, ја држев за рака, ја тешев, ѝ реков дека сè ќе биде во ред. Таа само ми рече: „Боже мој, што се случи“, а неколку моменти подоцна доживеа срцев удар“, вели пожарникарот.
„Не ја препознав дека е принцезата Дајана“
Потоа рече дека започнал со кардиопулмонална реанимација и неколку секунди подоцна таа повторно почнала да дише.
„За мене беше огромно олеснување, како пожарникар секогаш сакаш да спасиш нечиј живот и мислев дека го направив тоа. Верував дека ќе преживее. Беше жива во амбулантното возило и верував дека ќе преживее. Подоцна дознав дека починала во болница. Сега знам дека имала сериозни внатрешни повреди и сè уште се сеќавам на сè што се случи. Сеќавањето на таа ноќ ќе остане со мене засекогаш. Во тоа време немав поим дека е принцезата Дајана. Дури кога ја ставија во амбулантното возило, еден од болничарите ми кажа дека е таа“, се присети тој. И покрај напорите на лекарите, принцезата Дајана беше прогласена за мртва во 4 часот наутро по локално време во болницата Пити-Салпетриер во Париз. Десетици илјади луѓе дојдоа да ѝ оддадат почит на принцезата во нејзиниот дом во Кенсингтонската палата, жалејќи за загубата на жената што многумина никогаш не ја запознале, но ја сакале неизмерно.
