Тренерот на Барселона, Ханси Флик од новинарите беше запрашан за Ламине Јамал и неговото наводно доцнење на тренинг, што почна да се случува почесто, а едно такво доцнење беше забележано и пред дуелот со ПСЖ на почетокот на месецот.
Се шпекулираше дека Флик потоа планирал да го отстрани Јамал од тимот, но дека спортскиот директор Деко интервенирал и го спречил неговото отстранување од тимот. Флик остро реагираше на овие шпекулации, негирајќи ги сите гласини.
„Би сакал да знам од каде ја добивте таа гласина. Тоа е глупост. Не е вистина. Во овој клуб, со Деко и другите професионалци, имам вистински однос. Ја ценам нивната доверба во нашата работа. Тоа е глупост. Кој и да го кажал тоа – излажал“, рече Флик.
Тренерот на Барселона нагласи дека Деко и остатокот од управата никогаш нема да го замолат да ги промени своите одлуки и дека постои целосна доверба меѓу него и клубот.
„Имаме целосна и меѓусебна доверба и тие никогаш не би побарале нешто такво. Повторувам: ова е целосна глупост и немам што да кријам, бидејќи е апсолутно невистина. И ако некој го кажал тоа, лаже“, додаде тој.
Јамал, кој има само 18 години, стана клучна фигура во Барселона и лидер на новата генерација на каталонскиот клуб. Тој постигна два гола и регистрираше четири асистенции во пет натпревари оваа сезона.
