Жером Боатенг сепак нема да ја одработи планираната тренерска пракса во Баерн Минхен. По бурните реакции и протестите на навивачите, клубот и поранешниот дефанзивец донесоа заедничка одлука за прекин на соработката, пишува германски Kicker.
Сè започна на средината на септември, кога 37-годишниот светски првак од 2014 година објави крај на својата играчка кариера и ја изрази желбата да стане тренер. Тренерот на Баерн, Винсент Компани — негов поранешен соиграч во Хамбургер и Манчестер Сити — му ја понуди можноста да го следи и учи во рамките на праксата во минхенскиот гигант.
Пресуда и отпор од навивачите
Сепак, оваа понуда наиде на жесток отпор кај навивачите на рекордниот шампион. На дербито против Борусија Дортмунд, на јужната трибина се појавија транспаренти со пораки како:
- „Нема место во нашиот клуб за оние што се однесуваат како свињи. Нема повеќе место за Боатенг!“
- „Кој му дава простор на сторителот, ја дели неговата вина.“
- „Нема сцена за насилници.“
- „Мрш, насилнику!“
Протестите беа насочени кон пресудата на Земскиот суд во Минхен од 2024 година, со која Боатенг беше прогласен за виновен за намерно нанесување телесни повреди на својата поранешна девојка. Боатенг, кој го носеше дресот на Баерн од 2011 до 2021 година и со клубот двапати ја освои Лигата на шампионите, и понатаму ги негира обвинувањата.
Баерн во саботата вечерта објави кратко соопштение:
„Во конструктивната размена на мислења што клубот и Џером Боатенг ја имаа оваа недела, беше одлучено дека Жером Боатенг нема да ја одработи праксата во Баерн. Жером се чувствува многу поврзан со Баерн и не сака клубот да трпи штета поради моменталната контроверзна расправа за него.“
И самиот Џером Боатенг се огласи на својот Инстаграм профил, дури и пред официјалното соопштение на клубот. Тој напиша дека, „по неодамнешните расправи за мене, заклучив дека е најдобро да се фокусирам на други работи“, вклучувајќи го и стекнувањето А-лиценца, откако веќе успешно го положил испитот за Б-лиценца.
Во објавата се заблагодари на раководството на клубот и на Винсент Компани „за довербата и можноста да бидам дел од тоа. Од срце ви посакувам на крајот од сезоната да ги остварите своите големи цели.“
Боатенг додаде и дека не сака да биде пречка, нагласувајќи дека фокусот треба да остане исклучиво на теренот.
