„Седиштето на американската Вселенска команда ќе се пресели во прекрасното место Хантсвил, Алабама, кое од сега ќе биде познато како ‘Rocket City’“ (град на ракети), рече Трамп на прес-конференција во Белата куќа.
Командата, која е одговорна за воените операции на САД во вселената, моментално е стационирана во Базата на вселенски сили Петерсон во Колорадо, каде што се вработени околу 1.700 лица.
Гувернер на Колорадо е демократот Џаред Полис, додека гувернер на Алабама е републиканката Кеј Ајви.
Претседателот Џо Бајден претходно, на привремена основа, го назначи Колорадо како седиште на командата.
Трамп, кој долго време се залага за Редстоун Арсенал во Хантсвил, вети 30.000 работни места за регионот, без да објасни како тоа се вклопува со тековниот број на вработени во Колорадо.
Вселенската команда е една од 11 американски борбени команди во рамките на Министерството за одбрана на САД, заедно со единици одговорни за операции во Европа, Африка и киберпросторот.
Мисијата на командата вклучува следење на објекти во орбита преку сателити, поддршка на други гранки на вооружените сили како Военото воздухопловство и Морнарицата, и обезбедување на рано предупредување за ракетни напади.
Трамп првпат го најави формирањето на Вселенската команда на крајот на 2018 година, консолидирајќи одговорности што претходно биле распоредени низ повеќе воени оддели.
