Словачка ќе испорача на Украина нов пакет енергетска опрема во вредност од 500.000 евра, а 300.000 евра од Братислава до Киев ќе бидат насочени кон создавање засолништа од бомби во училиштата, објави украинскиот министер за надворешни работи Андриј Сибиха на „Х“.
Сибиха се сретна со својот словачки колега Јурај Бланар во градот Кошице, Словачка, во рамките на третиот круг меѓувладини консултации со кои претседаваа премиерите на двете земји - Јулија Свириденко и Роберт Фицо.
Беа дискутирани стратешки билатерални прашања и начини за продлабочување на политичкиот дијалог. Сибиха ѝ се заблагодари на Словачка за поддршката на суверенитетот, територијалниот интегритет и кандидатурата на Украина за членство во ЕУ - истовремено со Молдавија и без „поделба“.
„Го информирав мојот словачки колега за неодамнешните руски напади врз нашата енергетска инфраструктура и цивили. И сум му благодарен за неговото навремено соопштение дека Словачка ќе испорача нов пакет енергетска опрема на Украина во вредност од 500.000 евра, напиша Сибиха на „Х“.
Според него, словачката страна ќе обезбеди и 300.000 евра за изградба на засолништа од бомби во училиштата во регионите на Украина низ кои минува линијата на фронтот.
-Словачката страна е подготвена да придонесе за безбедносните гаранции на Украина во рамките на новата безбедносна архитектура на Европа, нагласи Сибиха.
Министрите разговараа и за 19-тиот пакет санкции против Русија, кој се очекува наскоро да стапи на сила. Украинскиот министер за надворешни работи ја нагласи важноста од целосно одмрзнување на руските средства во корист на Украина.
