Агенцијата наводно организирала и експлозија на железничка линија во јужниот регион Орјол во Русија и излетување од шините на локомотива и товарен воз на северозапад, близу Санкт Петербург.
Експлозија се случила доцна синоќа во регионот Орјол, блиску до украинската граница. Железнички работници таму пронашле сомнителен пакет и ја повикале Руската национална гарда.
Направата експлодирала додека експерти за демонтажа на бомби се обидувале да ја деактивираат, при што двајца војници загинале на лице место, а трет подоцна им подлегнал на повредите. Линијата била затворена неколку часа и повеќе од десетина возови биле пренасочени пред една пруга повторно да биде отворена денеска попладне.
Подоцна, товарен воз излетал од шините во Ленинградскиот регион близу Санкт Петербург. Бидејќи неговите цистерни биле празни, не била пријавена поголема штета. Неколку часа потоа, локомотива излетала од шините во друг округ на истиот регион, при што машиновозачот загинал, а големи делови од пругата биле затворени.
- Со уништување на железничката инфраструктура на овие делови, Русите се соочуваат со значајни логистички проблеми, што за возврат влијае на нивната способност да изведуваат активни операции против украинските вооружени сили, цитираа украинските медиуми портпарол на ХУР.
Воени експерти одамна укажуваат дека руската железничка мрежа е клучен елемент на нејзиниот воен напор во Украина, пренесе ДПА.
