„Европските лидери испраќаат јасна порака до Русија дека сега е време да се стави крај на војната во Украина. Ако оваа војна не заврши, ако нема пат кон мир на краток рок, тогаш САД, заедно со нашите сојузници, ќе преземат неопходни чекори за да ѝ наметнат цена на Русија за нејзината континуирана агресија“, рече Хегсет на состанокот во Брисел, објави Ројтерс.
„Ќе ја завршиме војната“
„Ако мора да го направиме овој чекор, Министерството за одбрана на САД е подготвено да го направи својот дел на начини што само САД можат да ги направат“, објави тој.
Тој истакна дека САД го гледаат смртоносниот и способен НАТО под водство на Европа и украинската армија способна да се одбрани како најефикасно средство за одвраќање од руската агресија.
„Под цврстото водство на претседателот Трамп, а особено со нашите европски сојузници, ќе ја завршиме војната во Украина. Војната мора да заврши“, рече тој.
Некои земји се неподготвени да ѝ помогнат на Украина
Хегсет ги повика сојузниците да ги зголемат инвестициите во програмата „Приоритетна листа на барања за Украина“ (PURL), која ги замени донациите за оружје од САД за Украина и бара од сојузниците да платат за испораките на оружје од САД.
Генералниот секретар на НАТО, Марк Руте, потврди дека преку тој механизам веќе се ветени две милијарди долари, но ова е помалку од 3,5 милијарди долари што украинскиот претседател Володимир Зеленски се надеваше дека ќе ги обезбеди до октомври.
Шведска, Естонија и Финска денеска ветија дека ќе придонесат, но земјите, вклучувајќи ги Шпанија, Италија, Франција и Велика Британија, се соочија со критики за воздржувањето. Украина останува во голема мера зависна од американското оружје додека се подготвува за уште една зима во конфликт со Русија.
Килскиот институт за светска економија денес објави дека воената помош за Украина се намалила за 43 проценти во јули и август во споредба со првата половина од годината.
