Француската полиција пронашла повеќе од 306 килограми скапоцени метали, претежно злато, во вредност од околу 28 милиони евра (29,1 милиони долари) во скривалиште на петмина мажи и една жена уапсени под сомнение за грабеж на лабораторија за преработка на злато во Лион, објави денеска јавниот обвинител.
Според обвинителот на Лион, Тиери Дран, крадците биле уапсени во четвртокот, само два часа по провалата во лабораторијата за преработка на скапоцени метали, благодарение на брзата полициска акција, објави BFM TV.
Разбојниците користеле експлозиви и воено оружје за време на грабежот, а вистински арсенал бил пронајден во нивната „безбедна куќа“ за време на претресот.
Покрај петмината мажи, уапсена е и една жена која, заедно со уште еден осомничен, негираше вмешаност, додека другите четворица осомничени се бранеле со молчење.
Тие биле изведени пред истражен суд, а обвинителот рекол дека сака да бидат обвинети за заговор за извршување организиран криминал и вооружен грабеж.
Како што изјави обвинителот Дран, станува збор за искусни криминалци, бидејќи сите петмина осомничени имаат претходни пресуди.
Тие извршија рација во лабораторијата Пуркери во Лион во четврток, користејќи експлозиви, автоматски пушки и пиштоли.
Петмина вработени во лабораторијата беа полесно повредени за време на грабежот, според BFM TV.
