Американските медиуми пренесуваат дека во претходните месеци обилните врнежи и ненадејните поројни дождови предизвикаа ненадејни поплави и лизгање на земјиштето во планинските области на север и северозапад од земјата.
Жителите на источен Пенџаб беа погодени од невообичаено обилни дождови и поплави што следеа откако Индија испушти вода од надојдените реки и преполните брани во низинските области на Пакистан.
-Ова е најголемата поплава во историјата на Пенџаб. Два милиони луѓе се погодени. За прв пат, трите реки: Сутлеџ, Ченаб и Рави, носат толку многу вода, рече министерката на Пенџаб, Меријам Ауранџеб.
Локалните власти ги користат училиштата, полициските и безбедносните објекти како центри за евакуација и спасување, а населението се евакуира и со брод, додаде Ауранџеб.
„Министерството за надворешни работи собира податоци за намерно испуштање вода од Индија“, рече таа.
Индија минатата недела го информираше Пакистан за можни прекугранични поплави, што е првиот јавен дипломатски контакт меѓу двете земји од кризата во мај, кога беа на работ на конфликт.
Пенџаб има клучна улога во земјоделството на Пакистан и е главен регион за производство на пченица, објаснуваат американските медуми.
Според Националниот метеоролошки центар на Пакистан, Пенџаб меѓу 1 јули и 27 август примил 26,5 проценти повеќе монсунски врнежи отколку истиот период лани.
Сезоната на монсуни во Пакистан обично трае до крајот на септември.
