Рускиот претседател Владимир Путин ќе даде нов импулс на идејата за мултиполарен светски поредок за време на неговата четиридневна посета на Кина, објави ДПА, повикувајќи се на долгото интервју што го даде за кинеската државна агенција Ксинхуа во пресрет на неговата посета на земјата.
Разговорот со кинескиот претседател Си Џинпинг на самитот на Шангајската организација за соработка (ШОС) во Тјенџин треба да доведе до „нов моќен импулс“ во создавањето на овој светски поредок, рече Путин во интервјуто, пренесено од германската агенција.
Во интервјуто, што беше објавено на веб-страницата на Кремљ, рускиот претседател не ги спомена САД и војната во Украина.
Путин постојано изразува поддршка за намалување на американската доминација во светските случувања. Во интервјуто, тој, исто така, го забележа слабеењето на доларот. Русија и Кина, на пример, во меѓусебното тргување речиси целосно се префрлија на своите национални валути.
Тој, исто така, го гледа зајакнувањето на Глобалниот Југ, предводен од земјите на БРИКС - првично Бразил, Русија, Индија, Кина и Јужна Африка, на кои им се придружија нови членки - како клучен елемент во градењето на нов светски поредок.
Според Кремљ, Путин ќе разговара со голем број лидери, меѓу кои и од Индија, Турција, Иран, Србија и Пакистан.
Самитот, што ќе се одржи утре и задутре, ќе биде најголемиот откако е основана Шангајската организација за соработка пред 24 години. Кина очекува на самитот да присуствуваат претставници од 20 земји и 10 организации. ШОС има 10 земји-членки во која покрај основачите Русија, Кина, Казахстан, Киргистан, Таџикистан и Узбекистан, од 2023 во нејзината работа учествуваат и Индија, Пакистан, Иран, а од 2024 година и Белорусија.
