Ерата на Жозе Мурињо на клупата на турски Фенербахче заврши. Утрово истанбулскиот гигант со соопштение потврди дека Мурињо заминува од кормилото на Фенербахче.
„Се разделивме со Жозе Мурињо, кој беше менаџер на нашиот професионален фудбалски тим од сезоната 2024-2025. Му благодариме за неговите напори и работа во нашиот тим и му посакуваме успех во неговата идна кариера“, напишаа од Фенербахче.
Португалскиот стратег беше на клупата на истанбулскиот тим 62 натпревари. Под негово водство, фенер имаше победи на 37 од тие 62 натпревари, претрпе 11 порази и имаше 14 ремија.
Вчера по елиминацијата од европските купови, отказ доби и тренерот на уште еден турски гигант, Бешикташ. Станува збор за норвежанецот Оле Гунар Солскјер, кој седна на клупата на Бешикташ на 18 јануари оваа година и издржа точно 8 месеци.
