Сателитските податоци и нумеричките моделирања покажале дека повеќе од една петтина од светските океани потемнеле помеѓу 2003 и 2022 година, со што се намалил појасот на вода во кој може да опстане живот што зависи од сончева и месечева светлина.
Овој ефект е забележан на површина од 75 милиони квадратни километри океан, што одговара на вкупната копнена површина на Европа, Африка, Кина и Северна Америка заедно, и го нарушува горниот слој на водата каде што живеат 90 проценти од морските видови.
Томас Дејвис, експерт за зачувување на морски екосистеми од Универзитетот во Плимут, изјавил дека откритијата претставуваат „сериозна причина за загриженост“, со потенцијално тешки последици по морските екосистеми, глобалниот риболов и клучните циклуси на јаглерод и хранливи материи во океаните.
Поголемиот дел од морскиот живот напредува во фотичките зони на светските океани — површинските слоеви низ кои минува доволно светлина за организмите да можат да ја искористат. Иако сончевата светлина може да продре до еден километар под површината, во пракса има многу малку светлина под 200 метри.
Не е сè така црно
Во овој горен слој на водата се наоѓаат микроскопски организми слични на растенија, познати како фитопланктон, кои вршат фотосинтеза. Овие организми претставуваат основа на речиси сите морски синџири на исхрана и произведуваат речиси половина од кислородот на планетата. Многу риби, морски цицачи и други животни ловат, се хранат и се размножуваат во потоплите води на фотичките зони, каде што има најмногу храна.
И покрај општото затемнување, околу 10 проценти од океаните, односно 37 милиони квадратни километри, станале посветли во последните 20 години, покажува истражувањето. На пример, долж западниот брег на Ирска, многу голема површина од океанот е посветлена, но подалеку од брегот — потемнела.
