Централната јапонска префектура Гифу објави дека ќе почне да користи дронови што емитуваат звуци на лаење од кучиња и огномет за да ги исплашат мечките што се појавуваат сè повеќе во населените области.
Дроновите ќе бидат распоредени подоцна овој месец во Такајама, селото Ширакава и други области каде што нападите се зголемија во последните недели, објави Кјодо.
Во Ширакава, мече нападна шпански турист на почетокот на октомври, предизвикувајќи полесни повреди.
Гувернерот на префектурата, Јошихиде Есаки, рече дека властите сакаат да спроведат „проактивни и иновативни мерки“ за да жителите се чувствуваат побезбедно.
Локалната самоуправа рече дека ќе соработува со ловџиските здруженија за да го утврди бројот на дронови и нивните рути.
Од април до октомври, луѓето во префектурата пријавиле дека виделе мечки 836 пати, а пријавени се и четири случаи на повреди, што е зголемување во однос на 674 видувања и три повреди во претходниот период - од април 2024 година до март оваа година, соопштија локалните власти.
Извор: Б92
