Шпанија го сигнализираше својот став за предлогот на францускиот претседател Емануел Макрон за формирање меѓународна коалиција под мандат на Обединетите нации за стабилизирање на Газа, опишувајќи го како еден начин за донесување мир во регионот.
Макрон во понеделникот изјави дека мисијата со мандат на ОН ќе биде задолжена за обезбедување на Појасот Газа, заштита на цивилите и поддршка на неодредена палестинска власт.
Тој рече дека Советот за безбедност на ОН треба да работи на воспоставување на мисијата, додека Франција исто така ќе соработува со своите партнери.
-Предлогот... е едно од средствата што можат да помогнат во постигнувањето мир и безбедност во Газа и на Блискиот Исток, како и работата на УНРВА, агенцијата на ОН за палестинскиот народ, соопшти шпанското министерство.
Овие сили мора да бидат чекор кон градење решение за две држави, се додава во соопштението, осврнувајќи се на идејата за постигнување мир преку воспоставување палестинска држава покрај Израел, на територијата заземена од Израел во војната во 1967 година.
Шпанија е гласен критичар на проширувањето на војната во Газа од страна на Израел и минатата година им се придружи на неколку земји од ЕУ во признавањето на палестинска држава, група на која сега ѝ се придружи и Франција.
Со предлогот за мисија со мандат на ОН во Газа, Макрон се обидува да го искористи моментумот создаден со минатомесечното признавање на палестинската држава, што предизвика домино ефект на признавања, а Велика Британија, Канада и Австралија објавија планови да го сторат истото следниот месец.
