Во мај и јуни годинава Европејците одржуваа високо ниво на поддршка за Украина, особено воената помош, покажа анализата на Институтот, во која се истакнува дека значителен дел од испорачаното оружје повеќе не доаѓа од залихи, туку се набавува директно преку одбранбената индустрија.
„Ова значи дека Европа сега е пред САД во однос на вкупниот обем на воена помош обезбедена преку индустријата“, се наведува во анализата.
Групата Г7 неодамна и додели на Украина околу 6,3 милијарди евра финансиска помош, главно благодарение на механизмот за кредитирање за итно забрзување на приходите (ЕРА), се гледа од податоците од проектот Ukraine Support Tracker, што вклучува помош пријавена до јуни оваа година.
За првпат од почетокот на вториот мандат на претседателот Доналд Трамп, САД во мај одобрија голем извоз на оружје за Украина, но не како воена помош, туку како продажба што Киев ќе мора сам да ја финансира, посочува Институтот Кил.
Европските земји, од друга страна, продолжија да ја поддржуваат Украина - Германија додели пакет воена помош во вредност од пет милијарди евра, Норвешка 1,5 и Белгија 1,2 милијарди, Холандија, Велика Британија и Данска по 500-600 милиони евра.
Проектот за следење на поддршката на Институтот покажа дека од 10,5 милијарди евра воена помош доделени во мај и јуни, најмалку 4,6 милијарди треба да се насочат преку договори за набавка со одбранбени компании, наместо да се повлечат од залихите.
Овие договори, се наведува во анализата, првенствено се доделуваат на компании од Европа и Украина, што е јасен показател за растечката улога на производството на одбранбена опрема во воената помош.
Од почетокот на војната во Украина до јуни 2025 година, Европа издвои најмалку 35,1 милијарди евра воена помош преку набавки за одбрана, или 4,4 милијарди повеќе од САД.
Таро Нишикава, раководител на проектот „Мониторинг поддршка за Украина“, рече дека воената помош за Украина сè повеќе се одредува од капацитетот на одбранбената индустрија.
-Европа сега набави повеќе оружје преку нови договори отколку САД, што укажува на јасен премин од екстракција на арсенал кон индустриско производство. За да се обезбеди навремена и ефикасна испорака на ветената помош, на Европа ѝ е потребна силна и отпорна одбранбена индустрија, рече Нишикава.
Институтот Кил потсетува дека финансиската помош за Украина сега во голема мера се потпира на механизмот ЕРА, што е резултат на иницијатива на Групата Г7 и Европската комисија.
Таа иницијатива ѝ обезбедува на Украина вкупно 45 милијарди евра кредити финансирани од приходи од замрзнати руски средства.
