Португалија и делови од соседна Шпанија се соочија со неколкудневни екстремни временски услови предизвикани од бурата Клаудија, која овој викенд стигна и до делови од Велика Британија и Ирска, објави Ројтерс.
Португалските спасувачи во четврток ги пронајдоа телата на постар пар во нивната поплавена куќа во Фернао Фер, во близина на Лисабон. Се верува дека парот спиел кога поплавата стигнала до нивниот дом и не можеле да ја напуштат зградата поради налетот на вода.
Во саботата, бурата го погоди градот Албуфеира во јужна Португалија, а регионалниот командант на цивилната заштита Витор Ваз Пинто потврди дека 85-годишна Британка починала и дека 28 лица се повредени во блискиот хотел.
Португалската Агенција за цивилна заштита денес издаде портокалово предупредување за округот Брага, како и за регионите Фаро, Сетубал и Беха, додека жолто предупредување за времето е на сила во областите Вијана до Кастело, Порто, Визеу, Авеиро, Коимбра, Порталегре, Сантарем и Лисабон.
Жолтото предупредување е на сила во крајбрежната област на јужна Португалија и во планинските делови на островот Мадеира. Во Велика Британија, вчера силни поплави го погодија градот Монмут и околните области во југоисточен Велс, каде што локалната противпожарна и спасувачка служба спроведува операции за спасување и евакуација.
Надлежните власти во Велс издадоа 11 предупредувања за поплави, а во Англија, според најновото ажурирање од Агенцијата за животна средина, имало повеќе од 180 предупредувања за поплави.
Извор: Б92
