Авионот, кој полетал од Пула, се урна и се запали вчера попладне, а сведоците ја опишаа експлозијата како „огнена топка“. Аеродромот е затворен до понатамошно известување.
Снимките што се појавија на социјалните мрежи покажуваат огромни пламени и густ црн чад, а направени се и воздушни снимки од изгорените остатоци од авионот и оштетената област.
Полицијата, која вчера добила извештај за несреќата кратко пред 16 часот, сè уште собира информации и ги повикува сите што имаат снимки или информации за несреќата да се јават. Шефот на полицијата, Морган Кронин, рече дека во оваа фаза е клучно да се утврдат сите околности на инцидентот. Одделот за истрага на воздушни несреќи на Велика Британија е исто така на местото на настанот.
Аеродромот Саутенд во Лондон е затворен до понатамошно известување. На патниците што треба да патуваат во понеделник им се советува да ги контактираат своите авиокомпании. „Изиџет“, една од ретките авиокомпании што го користат Саутенд, изјави дека сите преостанати летови се пренасочени или откажани.
Холандската компанија „Зиуш Авиејшн“ потврди дека нејзиниот лет СУЗ1 бил вклучен во несреќата во Саутенд. Авионот претходно во текот на денот полетал од Атина до Пула, а потоа до Саутенд, од каде што требало да продолжи кон својата база во Лелистад, Холандија.
Компанијата соопшти дека соработува со властите во истрагата и изрази сочувство.
