Во соопштението се вели дека 83 кутии со нацистички материјал биле испратени во Аргентина од германската амбасада во Токио во јуни 1941 година, на јапонскиот пароброд „Нан-а-Мару“, и дека големата пратка го привлекла вниманието на властите, кои стравувале дека нејзината содржина би можела да влијае на неутралноста на Аргентина во војната, објави Ројтерс.
Argentina’s Supreme Court finds archives linked to the Nazi regime https://t.co/HflAqxARta
— CTV News (@CTVNews) May 12, 2025
И покрај тврдењата во тоа време од страна на германските дипломатски претставници дека кутиите содржат лични предмети, аргентинските царински власти пронашле разгледници, фотографии и пропаганден материјал на нацистичкиот режим, како и илјадници томови што ѝ припаѓале на нацистичката партија, за време на случаен претрес на пет кутии.
Потоа федерален судија ги конфискувал материјалите и го упатил случајот до Врховниот суд. Не било веднаш јасно зошто нацистичкиот материјал бил испратен во Аргентина или какви мерки, ако воопшто ги презел Врховниот суд во тоа време.
Судските службеници наишле на кутиите 84 години подоцна, додека подготвувале материјал за музејот на Врховниот суд.
„Со отворањето на една од кутиите, идентификувавме материјал што имаше за цел да ја консолидира и пропагира идеологијата на Адолф Хитлер во Аргентина за време на Втората светска војна“, соопшти судот.
Потоа судот ги премести кутиите во просторија опремена со дополнителни безбедносни мерки и го покани Музејот на холокаустот во Буенос Аирес да учествува во нивното зачувување и инвентаризација.
Беше објавено дека експертите ќе ги испитаат и во потрага по какви било траги за сè уште непознати аспекти на Холокаустот, како што се меѓународните мрежи за финансирање што ги користеле нацистите.
Аргентина остана неутрална во Втората светска војна до 1944 година, кога ги прекина односите со силите на Оската и ѝ објави војна на Германија и Јапонија следната година.
Според Музејот на холокаустот, од 1933 до 1954 година, 40.000 Евреи влегле во Аргентина бегајќи од нацистичкиот прогон во Европа, по што Аргентина станала дом на најбројно еврејско население во Латинска Америка.
