„И Русија и Украина мора да преговараат за прекин на огнот и траен мир. Време е да се постигне договор. Претседателот Трамп јасно стави до знаење дека ова мора да се направи до 8 август. САД се подготвени да преземат дополнителни мерки за да се обезбеди мир“, изјави високиот американски дипломат Џон Кели пред Советот за безбедност, објави Ројтерс.
Трамп изјави завчера дека САД ќе почнат да воведуваат царини и други мерки за Русија „за 10 дена“ доколку Москва не покаже напредок кон прекин на војната во Украина.
Киев и Москва одржаа три рунди разговори во Истанбул оваа година кои резултираа со размена на затвореници и телата на убиените, но без никаков напредок во смирувањето на речиси три и полгодишната војна.
‼️🇺🇸🇷🇺🇺🇦 #Trump made it clear that the crisis in #Ukraine must end by August 8, - said US Permanent Representative to the UN Kelly #Russia pic.twitter.com/s5qCP8LajA
— Maimunka News (@MaimunkaNews) July 31, 2025
„Имаме намера да ги продолжиме преговорите во Истанбул“, изјави заменик-амбасадорот на Русија во ОН, Дмитриј Пољански, пред Советот за безбедност, но тој исто така истакна дека „и покрај состаноците во Истанбул, сè уште постои страна на Западот која се залага за војна“.
„Сè уште ги слушаме гласовите на оние кои мислат дека дипломатијата е всушност начин да се критикува Русија и да се изврши притисок врз неа“, рече тој.
Заменик-амбасадорката на Украина во ОН, Кристина Хајовишин, изјави дека Русија мора да се соочи со „единство, решителност и акција“:
„Ние бараме сеопфатен, праведен и траен мир заснован на принципите на Повелбата на ОН и ништо помалку. Повторуваме, целосно, непосредно и безусловно прекинување на огнот е клучно. Ова е првиот чекор кон запирање на агресивната војна на Русија против Украина“, рече таа.
