Вознемирувачки шифрирани пораки ги открија злосторствата што двајцата мажи наводно ги извршиле врз двајца Хрвати.
Се верува дека осомничените се членови на „средниот менаџмент“ на озлогласената ќелија на бруталниот Кавачки клан, кој го контролирал „Декстер“ во Виена, кој отслужува доживотна казна затвор во затворот Штајн во Долна Австрија.
Србинот и Црногорецот, кои денеска беа изведени на суд во Виена, под масовни безбедносни мерки, се обвинети дека во 2020 година, заедно со други соучесници, ги намамиле наводниот син на милионер од Хрватска и уште еден Хрват (64) во Виена. Тие ги чекале во стан покриен со пластична фолија, ги врзувале, ги малтретирале и им се заканувале со смрт.
Според обвинителството, сцената изгледала како нешто што би го виделе само во ТВ серии и криминални филмови.
Жртвите биле заплашувани со „рачни пили и пиштоли со пригушувач“, а ситуацијата била како „најлош кошмар“, пишува Хојте. Повеќе од четири часа помладиот маж - за кого погрешно верувале дека е син на милионер - бил брутално злоставуван.
„Ако наскоро не ни кажат каде се парите, тогаш ќе мора да почнеме да сечеме“, пишувало во еден дел од преписката.
Потоа дошол редот на 64-годишникот.
„Старецот е завршен, овој го претепа, брате, во лицето. Целото лице му е искршено, брате... и е исечен со нож“, им соопштиле обвинетите на своите шефови во пораки. Плачејќи, жртвата наводно им ветила на мажите 750.000 евра.
Тешко претепаните жртви биле ослободени, само за набрзо потоа да бидат принудени да ги предадат парите во Хрватска - но 64-годишникот, кој заработувал за живот од шверц на цигари, успеал да собере само 10.000 евра. Интересно е што ниту тој, ниту другата жртва, ниту некој од сведоците, не сакале да ги идентификуваат обвинетите или да сведочат против нив. Што не е изненадување: во мафијашката средина, ваквите „ненадејни губитоци на меморијата не се невообичаени“.
Адвокатот на одбраната Александар Филип, исто така, тврдеше дека случајот на неговиот клиент е случај на погрешен идентитет, бидејќи името е многу честа појава на Балканот. Адвокатите на одбраната на првиот обвинет, Руди Мајер и Мирсад Муљиу, силно го негираа постоењето на кривичното дело киднапирање со изнуда во случајот на нивниот клиент.
Истрагата навистина покажа дека обвинението не било целосно правилно составено и морало да се измени. Сепак, на судењето со порота, тие се соочуваат со казна од десет до дваесет години затвор.
