Овој потег го отвора патот за преговори насочени кон формирање нова влада, која ќе мора да се справи со деликатната рамнотежа помеѓу американското и иранското влијание, соопштуваат британските медиуми.
Новата влада мора да управува со десетици вооружени групи кои се поблиски до Иран и се повеќе одговорни пред своите лидери отколку пред државата, а истовремено се соочува со зголемен притисок од Вашингтон да ги распушти милициите.
Според ирачкиот Устав, на 29 декември, на својата прва седница, парламентот го избра претседателот на парламентот и двајца заменици, а потоа мора да избере нов претседател во рок од 30 дена.
Претседателот, пак, ќе го задолжи најголемиот парламентарен блок да ја формира владата.
Шиитската политичка алијанса во соопштението наведува дека Малики е избран врз основа на неговото политичко и административно искуство и неговата улога во водењето на земјата.
Малики, висок функционер во шиитската исламистичка партија Дава, претходно беше премиер на Ирак во два мандата од 2006 година до 2014 година, во период обележан со секташко насилство, борба за власт со сунитските и курдските ривали и растечки тензии со САД, потсетуваат западните агенции.
Тој се повлече откако Исламска држава зазеде големи делови од земјата во 2014 година, но остана влијателен политички актер, водејќи ја коалицијата „Владеење на правото“ и одржувајќи блиски врски со фракциите поддржани од Иран.
Малики останува моќна сила во ирачката политика и покрај долгогодишните обвинувања дека ги поттикнувал секташките судири и не успеал да ја спречи Исламска држава да заземе големи делови од земјата пред една деценија.
