Жените, од кои четири се виетнамски државјанки и две од Ирак, поминале повеќе од 10 часа во тесен простор, опкружен со кутии со банани, надевајќи се дека ќе стигнат до Велика Британија или Ирска, јавува Гардијан.
Кога сфатиле дека камионот оди во спротивен правец, почнале да паничат. Температурата во камионот била многу ниска, што дополнително го зголемило чувството на страв. Во потрага по помош, едната од нив успеала да стигне до новинарка на BBC во Лондон.
„Толку е ладно“, ѝ рекла жената на новинарката Куе Лу преку СМС пораки. Таа рекла дека вратата од камионот била затворена со железна шипка и тие биле заробени внатре.
Жената ѝ испратила на Лу две кратки видеа на кои се гледа просторот преполн со кутии, оставајќи само неколку десетици сантиметри простор за да седат. На едно видео можело да се слушне жена како вели на англиски: „Не можам да дишам“.
Таа можела да ја обезбеди нејзината GPS локација, што ѝ овозможило на Лу да утврди дека камионот е на автопатот Е15 во близина на Драче, северно од Лион.
Лу испратила пораки до колегите во Франција. Еден од нив ја контактирал полициската станица најблиску до локацијата на камионот, испраќајќи ги сите информации што Лу ги собрала. Додека тие нетрпеливо чекале да интервенира полицијата, Лу продолжила да го следи возилото.
Лу, плашејќи се дека нема да издржат уште многу, се обидела да ги смири жените велејќи им да избегнуваат разговори за да заштедат воздух и потсетувајќи ги дека полицијата е на пат.
Таа продолжила да комуницира со младата жена, која рекла дека уште три лица требало да влезат во камионот со нив, но тие се повлекле. Наместо тоа, еден од нив направил фотографија на која е снимен ирскиот регистарски број на камионот.
Набргу потоа француската полиција соопштила дека успеале да го пресретнат камионот. Возачот е уапсен и покрената е истрага поради сомнение за шверц на луѓе. Неколку часа подоцна, францускиот обвинител изјавил дека возилото е од Литванија и дека возачот е под истрага. Меѓу шесте жени кои биле спасени од камионот имало и малолетно лице, изјавил обвинителот.
