Администрацијата на американскиот претседател Доналд Трамп најави итно пренесување на речиси 110.000 хектари федерално земјиште долж границата меѓу САД и Мексико на војската за да се спречи илегалната миграција, соопшти денеска американското Министерство за природни ресурси.
Во соопштението се наведува дека земјата ќе ѝ биде дадена на војската на три години, а за тоа време на федералниот персонал ќе му биде дозволено да патролира и да изгради инфраструктура за да спречи илегални преминувања на границите, објави Ројтерс.
Се нагласува дека овој потег има за цел да помогне во борбата против трговијата со дрога и криумчарењето мигранти.
Веднаш по преземањето на функцијата на 20 јануари, Трамп прогласи вонредна состојба на американско-мексиканската граница и ја задолжи американската војска и Пентагон да помогне во обезбедувањето на границата.
