Пит Хегсет, секретарот за одбрана на Соединетите Американски Држави, имал необезбедена интернет-врска во својата канцеларија во Пентагон, за да може да ги заобиколи владините безбедносни протоколи и да ја користи апликацијата за пораки „Сигнал“ на својот личен компјутер.
Ова го изјавија два извори запознаени со ситуацијата за агенцијата Асошиејтед Прес, а го објави британскиот „Гардијан“.
ABC News, исто така, објави дека Пит Хегсет имал таканаречена „валкана линија“, како што ИТ експертите ја нарекуваат комерцијалната интернет-врска, која се користи за пристап до страници блокирани на неофицијалните и официјалните мрежи на Пентагон.
Компјутерите на Министерството за одбрана на САД се поврзуваат на интернет преку два система: SIPRNet, безбеден мрежен систем за класифицирани информации, и NIPRNet, мрежа за некласифицирани информации.
Pete Hegseth reportedly had unsecured office internet line to connect to Signal https://t.co/ABmrg5uYND
— The Irish Times (@IrishTimes) April 25, 2025
Фактот дека Хегсет ги заобиколил безбедносните филтри на Пентагон за да пристапи до интернет на овој начин, ја зголемува можноста дека чувствителните одбранбени информации можеби биле изложени на ризик од хакирање или надзор од странски служби.
Извори за АП изјавија дека во некои моменти на бирото на Хегсет имало три компјутери: еден личен, друг за класифицирани информации и трет за чувствителни воени податоци. Бидејќи електронските уреди се ранливи на шпионски софтвер, никому не му е дозволено да ги користи во канцеларијата на секретарот за одбрана.
Најновите извештаи го продолжуваат скандалот околу серијата протекувања поврзани со користењето на апликацијата „Сигнал“ од страна на Хегсет за испраќање доверливи воени податоци до тесен круг членови на семејството и пријатели. „Вашингтон пост“ минатата недела објави дека Хегсет, поранешен водител на „Фокс њуз“ за викенд, нарачал инсталација на апликацијата „Сигнал“ на десктоп компјутер во неговата канцеларија во Пентагон.
„Можеме да потврдиме дека секретарот никогаш не го користел и во моментов не го користи Signal на својот владин компјутер“, рече Шон Парнел, шефот на Пентагон.
Порано оваа недела, „Гардијан“ потврди извештај на „Њујорк тајмс“ дека Хегсет споделувал класифицирани оперативни информации за нападите врз бунтовниците Хути во Јемен преку приватна соба за разговор „Сигнал“, која самиот ја поставил за да комуницира со својата сопруга, брат, личен адвокат и девет други блиски соработници.
Кога во 2016 година беше објавено дека Хилари Клинтон користела приватен е-мејл сервер за службени работи додека била државен секретар, Хегсет остро ја нападна поранешната прва дама во изјава за „Фокс њуз“:
„Секој безбедносен професионалец, воен или владин, веднаш би бил отпуштен поради ваквото однесување и би бил гонет. Фактот дека таа нема да биде повикана на одговорност за ова, мислам, го зачудува секој што некогаш чувал државни тајни и имал пристап до највисоко класифицирани информации, како мене.“
