„Сегашниот план е бродот да го продолжи своето патување кон Канарските Острови“. Шпанските власти „наведоа дека ќе го прифатат тоа за да спроведат целосна истрага и, секако, да ги проценат ризиците за патниците на бродот“, изјави Марија Ван Керхове, вршител на должноста директор на Одделот за епидемиска подготвеност и одговор на СЗО, за новинарите во Женева.
Проценка на ситуацијата
„Ризикот за пошироката јавност е низок. Ова не е вирус што се шири како грип или КОВИД-19. Ова е сосема различно“, додаде таа. Според СЗО, можно е вирусот да бил пренесен на крузерот помеѓу луѓе кои биле во близок контакт.
Фокусот сега е на евакуација на двајцата болни патници, соопшти СЗО. Шпанија „нема да донесе никаква одлука“ за пристанување на крузер погоден од можна епидемија на хантавирус додека не се анализираат „епидемиолошките податоци“, објави во меѓувреме шпанското Министерство за здравство, очигледно спротивставувајќи се на СЗО.
„Во зависност од епидемиолошките податоци собрани на бродот за време на неговиот премин низ островите Зелен ’Рт, ќе се донесе одлука за најсоодветното пристаниште. Дотогаш, Министерството за здравство нема да донесе никаква одлука, како што ја информиравме Светската здравствена организација“, напиша министерството на X, кратко откако СЗО посочи дека Шпанија се согласила да го прими крузерот на Канарските Острови.
Неколку заразени
Околу 150 лица беа на бродот откако тројца - холандски пар и германски државјанин - починаа, а други се разболеа, вклучувајќи и еден Британец кој го напушти бродот и се лекува во Јужна Африка.
Хантавирусот, кој може да предизвика фатална респираторна болест, се пренесува кога честичките од измет или урина од глодари стануваат воздушни. Не се пренесува лесно меѓу луѓето. Не постои специфичен лек за болеста, па затоа третманот се базира на медицинска нега, вклучително и вентилатори во тешки случаи.
Властите на островите Зелен ’Рт не дозволија бродот „Хондиус“ да се закотви под холандско знаме како мерка на претпазливост. СЗО претходно објави дека на крузерот се идентификувани седум случаи на хантавирус, вклучувајќи два лабораториски потврдени и пет сомнителни случаи. На крузерот има претежно британски, американски и шпански туристи.
