Инцидентот е снимен во градот Алентаун, во американската држава Пенсилванија, а снимката се појави на мрежите, објавува Дејли Меил.
„Тоа беше велигденско чудо“
Како што е објавено, авионот полетал од Њу Џерси до Индијана во сабота наутро, а по некое време пилотот пријавил проблеми со моторот.
Според радиокомуникацијата, пилотот не бил сигурен дали да слета на автопатот, но немал друг избор.
Драматичната снимка, снимена од камера на автомобил, го покажува авионот како лета ниско, а потоа се спушта на автопатот 78 во Алентаун.
65-годишниот пилот од Мичиген и 34-годишниот патник од Њу Џерси биле во кабината. Двајцата избегале без повреди, како и возачите на автопатот.
„Тоа беше велигденско чудо! Пилотот слета и зазеде две ленти. Не изгледаше дека е во паника, само гледаше право напред“, рече Виктор Масиес, сведок на необичниот настан.
„Сите соработуваа многу добро“
Емили Ривера го објави видеото на социјалните мрежи, целосно изненадена од глетката.
„Искрено, бев во неверица, бидејќи не очекував авионот да слета пред мене“, изјави таа за локалните медиуми.
Службите за итни случаи брзо пристигнаа на местото на настанот. Командантот на доброволната противпожарна служба, Џастин Освалд, открива дека сите дошле на помош.
„Ова е веројатно најдобриот можен исход. Сите соработувале многу добро за да направат нешто што не е дел од нивната секојдневна работа“, додаде тој.
Авионот бил транспортиран до блискиот аеродром Алентаун, а Федералната администрација за воздухопловство (FAA) го истражува инцидентот.
