Во раните утрински часови, помеѓу раскрсниците Јадерберг и Хан-Лемден, се случила тешка сообраќајна несреќа во која животот го загуби 22-годишен возач на БМВ. Според првичните информации, младиот човек ја изгубил контролата врз возилото поради екстремно лизгавата површина.
Силна бура проследена со ветрови со сила на ураган, град и обилни дождови ја зафати Германија, предизвикувајќи сериозни последици во неколку сојузни покраини. Противпожарните екипи беа во постојана акција, додека бројни прекини и доцнења беа регистрирани во железничкиот и S-Bahn сообраќајот. Во Долна Саксонија, еден возач не ја преживеа бурната ноќ.
Неговиот автомобил прво удри во заштитна ограда, потоа се врати на патот и се лизна кон зелената површина покрај патот. Таму, удри во неколку дрвја, по што возилото веднаш се запали. Случаен минувач се обидел да помогне, но не можел да го извлече младиот човек од запаленото возило. Додека пожарникарите го изгаснале пламенот, возачот веќе бил мртов.
Несреќата го затворила автопатот неколку часа, а материјалната штета се проценува на над 100.000 евра, објавува „Билд“.
Во Берлин, бурата целосно ја запрела мрежата на S-Bahn, а целиот железнички сообраќај бил привремено прекинат. Пожарникарите имале дури 780 интервенции во главниот град, главно поради искорнати и скршени дрвја.
Во Потсдам, главниот град на Бранденбург, жена и маж биле тешко повредени кога биле погодени од круната на паднато дрво во парк. Жената е во животна опасност, додека мажот е тешко повреден.
Бурата ја погодила и Саксонија-Анхалт, а регионот Алтмарк на северот од покраината бил најтешко погоден. Службите за итни случаи регистрирале околу 280 интервенции во окрузите Штендал и Залцведел. Железничкиот сообраќај во регионот останал нарушен во петокот наутро, предизвикувајќи доцнења и откажувања на возовите на долги релации.
Според локалната служба во Дингелштат, снежна бура беснеела и во Тирингија. Ветерот собори дрвја и предизвика бројни операции за гаснење пожари.
Германија сè уште се справува со последиците од ова силно невреме, а властите ги повикаа граѓаните да ги почитуваат предупредувањата и да избегнуваат престој на отворено во погодените области.
