„На безусловен прекин на огнот не му претходат преговори“, им рече Макрон на новинарите додека излегуваше од воз во полскиот град Пшемишл по враќањето од патувањето во Украина, објави Франс24.
Макрон додаде дека Путин „бара излез, но сепак сака да купи време“.
Предлогот на Путин за директни разговори со Украина дојде неколку часа откако големите европски сили побараа вчера во Киев Путин да се согласи на безусловно 30-дневно примирје или ќе се соочи со „масивни“ нови санкции. Путин го отфрли тоа што го нарече обид на некои европски сили да издадат „ултиматуми“.
Рускиот претседател синоќа на прес-конференција во Москва предложи одржување директни разговори меѓу Русија и Украина за прекин на огнот во Турција на 15 мај.
Лидерите на таканаречената „коалиција на подготвените“ и Украина вчера усвоија заедничка изјава во Киев, со која се согласуваат на целосен и безусловно прекин на огнот што ќе започне на 12 мај, а ќе трае најмалку 30 дена, според веб-страницата на украинскиот претседател Володимир Зеленски.
Како што наведоа во заедничко соопштение лидерите на Велика Британија, Франција, Германија, Полска и Украина, ова примирје не може да биде ограничено со какви било услови, а доколку Русија постави какви било услови, тоа би се протолкувало како обид за продолжување на војната.
