Корпусот на Исламската револуционерна гарда (ИРГК) утринава соопшти дека тие ќе „го одредат крајот на војната“, отфрлајќи ги изјавите на американскиот претседател Доналд Трамп во кои се сугерира дека конфликтот со Иран наскоро би можел да заврши.
„Ние сме тие што ќе го одредат крајот на војната“, се наведува во соопштението на ИРГК, кое го пренесе иранската агенција Тасним.
„Условите на бојното поле и крајот на војната се во рацете на Исламската Република“, се додава во соопштението.
Трамп претходно за американската телевизиска станица Си-Би-Ес њуз изјави дека смета дека војната со Иран е речиси завршена.
„Тие немаат морнарица, немаат комуникации, немаат воздухопловни сили. Тие само имаат неколку ракети. Нивните беспилотни летала се уриваат насекаде, дури и оние од сопствено производство. Ако погледнете, не им останува ништо. Не им останува ништо во воена смисла“, рече тој.
Трамп додаде дека САД се „многу далеку“ пред првично проценетиот временски период од четири до пет недели.
Израелските и американските сили го нападнаа Иран кон крајот на февруари, целејќи го политичкото и военото раководство на земјата, како и нејзината воздушна одбрана, морнарица, воздухопловни сили и други воени капацитети.
По почетокот на нападите, Трамп рече дека очекува кампањата да трае четири до пет недели.
Кризата на Блискиот Исток го запре бродскиот сообраќај и извозот на енергија преку виталниот Ормутски теснец, низ кој минуваат околу една петтина од глобалните текови на нафта и течен природен гас.
Иранската револуционерна гарда соопшти дека секоја арапска или европска земја што ќе ги протера амбасадорите на Израел и САД од својата територија ќе има целосна власт и слобода на минување низ Ормутскиот теснец, објавија синоќа иранските државни медиуми.
Стотици бродови остануваат закотвени од двете страни на стратешкиот воден пат, додека пазарите на нафта и превоз очекуваат каков било знак дека пловидбите би можеле да се зголемат низ тесниот коридор.
