Пакистански и авганистански војници си размениле меѓусебен оган на граничен премин што е затворен повеќе од една недела поради спор меѓу двете соседни земји, соопштија денеска официјални лица.
Министерството за внатрешни работи на Авганистан соопшти дека еден припадник на авганистанската армија загинал, а друг е повреден во инцидентот на преминот Торкам, што е затворен веќе 11 дена поради приговорот на Пакистан за изградба на нови гранични премини организирани од Авганистан.
И двете земји во минатото ги затвораа граничните премини Торкам и Чаман, најчесто поради судири меѓу војниците.
Премините се од витално значење за трговијата и патувањето меѓу Пакистан и Авганистан.
Пакистански официјален претставник изјави дека авганистанските талибанци „почнале да пукаат рано утринава, гаѓајќи ја пакистанската гранична станица“, на што и пакистанските војници возвратиле.
-Пакистанскиот персонал возврати со оган, рече официјалниот претставник.
Портпаролот на авганистанското Министерство за внатрешни работи Абдул Матин Кани рече дека Пакистан го иницирал насилството и авганистанската гранична полиција се обидела да го реши проблемот преку дијалог.
-Но, тие (Пакистан) продолжија да се борат и нашите безбедносни сили преминаа во одбранбен режим и возвратија со оган, рече Кани.
Кани додаде дека и Пакистан, исто така, претрпел жртви, без да даде бројка или штета на граничните премини.
Во меѓувреме, илјадници камиони и возила се заглавени од двете страни на преминот Торкам. /МИА
