Талибанците во неделата објавија забрана за одгледување наркотици во Авганистан, најголемиот светски производител на опиум.
„Според указот на врховниот водач на Исламскиот емират Авганистан, сите Авганистанци се информирани дека од сега па натаму, одгледувањето афион е строго забрането низ целата земја“, се вели во наредбата на врховниот лидер на Талибанците Хаибатула Ахунџада.
„Доколку некој го прекрши декретот, родот веднаш ќе биде уништен, а прекршителот ќе биде третиран според шеријатскиот закон“, се вели во наредбата, објавена на прес-конференција на Министерството за внатрешни работи во Кабул.
Наредбата вели дека производството, употребата или транспортот на други наркотици, исто така, е забрането.
Контролата на дрогата е едно од главните барања на меѓународната заедница на исламистичката група, која ја презеде земјата во август и бара формално меѓународно признавање со цел да ги повлече санкциите кои сериозно го попречуваат банкарството, бизнисот и развојот.
Талибанците го забранија одгледувањето афион кон крајот на нивното последно владеење во 2000 година, бидејќи бараа меѓународен легитимитет, но се соочија со народни реакции и подоцна главно го променија својот став, наведуваат експертите.
Производството на опиум во Авганистан – за кое Обединетите нации процениле дека вредело 1,4 милијарди долари во својот врв во 2017 година – се зголемило во последните месеци, изјавија фармерите и членовите на Талибанците за Ројтерс.
Тешката економска ситуација во земјата ги натера жителите на југоисточните провинции да одгледуваат недозволена култура што може да им донесе побрз и поголем принос од легалните култури како што е пченицата.
Талибански извори изјавија за Ројтерс дека очекуваат силен отпор од некои елементи во групата против забраната за афион и дека има пораст на бројот на фармери кои одгледуваат афион во последните месеци.
Земјоделец во Хелманд, кој зборуваше под услов да остане анонимен, рече дека во последните недели цените на афионот веќе се двојно зголемени поради гласините дека Талибанците ќе го забранат неговото одгледување.
Но, тој додаде дека треба да одгледува афион за да го издржува своето семејство.
„Другите култури едноставно не се профитабилни“, рече тој.
Фото: стрингер
