Компанијата Неуралинк, во сопственост на милијардерот Илон Маск, објави дека добила одобрение од независно тело да започне со регрутирање пациенти за првите експерименти со вградување чипови во мозокот, пишува Гардијан.
Компанијата соопшти дека бара луѓе со парализа за да го тестираат уредот во следните шест години.
Неуралинк е една од неколкуте компании кои работат на развивање на врска меѓу мозокот и компјутер што ќе овозможи собирање и анализа на мозочните сигнали.
Сепак, бомбастичната промоција што ја спроведе милијардерот вклучува ветувања дека оваа врска меѓу мозокот и компјутер ќе им помогне на луѓето во трката со вештачката интелигенција, па наидува на скептицизам. Освен тоа, тие најави доведоа до покренување на многу етички прашања за неговата работа од страна на невронаучниците и други експерти.
Американската агенција за храна и лекови (ФДА) минатата година го отфрли барањето на Неуралинк да започне тестирање на чипот на луѓе, но во мај и беше дозволено да започне клинички студии.
Неуралинк соопшти дека бара пациенти со квадриплегија поради повреда на ‘рбетниот мозок или амиотрофична латерална склероза.
Тестовите кои оваа компанија ги правела врз животни биле жестоко критикувани, а поранешните вработени тврделе дека животните биле мачени, пишува Ројтерс.
Тврдењата покренаа неколку истраги. Доколку уредот се прогласи за безбеден за луѓето, пишува Гардијан, ќе бидат потребни децении пред да може да се даде на пациенти надвор од оваа клиничка студија.
