Стотици луѓе денеска протестираа пред Парламентот на Босна и Херцеговина во Сараево поради начинот на кој властите во земјата реагираа на поплавите, во кои загинаа 27 лица во октомври минатата година и да побараат казна за одговорните за жртвите и уништувањето.
На протестот, организиран од неформална група студенти преку социјалните мрежи, учествуваа околу 2.000 луѓе, меѓу кои и жителите на Јабланица, најтешко погодено место при минатогодишните поплави.
Демонстрантите носеа транспаренти на кои пишуваше „Злосторство без казна“ и „Кој е крив“.
Тие бараат итно да се почне истрага и да се санкционираат одговорните за жртвите во поплавите и казнен прогон на сите одговорни кои овозможиле илегално да работи каменоломот. Поради уривање на карпи од блискиот каменолом во градот Долна Јабланица загинаа 19 лица, а нивните куќи се уништени или сериозно оштетени.
Демонстрантите исто така побараа и објавување на податоците за собраната помош и за трошењето на средствата, како и да се објават планови за санација на поплавените подрачја. /МИА
