Директорот на српската Канцеларија за Косово и Метохија, Петар Петковиќ, денеска разговараше со специјалниот претставник на Европската унија за дијалог меѓу Белград и Приштина, Петер Соренсен, за прашања од значење за животот на Србите на Косово и понатамошните чекори во насока на продолжување на дијалогот како пат кон нормализација на односите.
Како што соопшти Канцеларијата, Петковиќ го информирал Соренсен за низа еднострани и ескалирачки потези што ги преземаат властите во Приштина, со цел да предизвикаат тензии и да го пропаднат дијалогот како и за серија неосновани и политички мотивирани апсења на Срби.
„Неодамна, поминаа 12 години откако Приштина не ја формираше Заедницата на српски општини (ЗСО), што беше предвидено во Бриселскиот договор, чија имплементација беше гарантирана од ЕУ. Многу од проблемите што ги имаме на терен денес и со кои се соочува српскиот народ, немаше ни да постоеја доколку беше формирана ЗСО, која, меѓу другото, треба да биде и рамка за зачувување и заштита на индивидуалните и колективните права на Србите“, нагласи Петковиќ.
На состанокот присуствуваше и шефот на делегацијата на Европската Унија во Србија, Емануел Жиофре.
Владата на Србија донесе денеска одлука на сите лица уапсени на Косово во, како што се наведува, „монтирана кривична постапка“, да им исплати еднократна финансиска помош во износ од 300.000 динари. Листата ќе биде преземена од евиденцијата на Канцеларијата за Косово и Метохија.
