Бугарската полиција соопшти дека сторителите, исто така, злоставувале лица со деменција или други проблеми со менталното здравје, објави Ројтерс.
Платите во Бугарија не се во чекор со растечките трошоци за грижа за стари лица и болни, а некои даватели на услуги ги експлоатирале ранливите пациенти со обезбедување услуги под стандард и злоупотреба на немоќните и болните.
„Најстрашното нешто што го видовме беа луѓето кои беа подложени на постојано физичко малтретирање: беа врзани, тепани и има докази дека биле дрогирани“, рече Иван Крастев, заменик-министер за труд и социјална политика на Бугарија.
Во петокот, полицијата изврши рација во дом за стари лица во селото Јагода во централна Бугарија, во кој се сместени 75 пациенти, при што беа уапсени пет лица осомничени за злоупотреба, а шестиот осомничен подоцна беше уапсен.
Тие се обвинети за незаконско лишување од слобода и попречување на слободното движење, недавање потребна помош на лице во опасност, физичко насилство и нанесување телесни повреди, изјави окружната обвинителка Тања Димитрова пред новинарите во понеделник. Единаесет пациенти биле префрлени во блиската државна болница, додека преостанатите 64 биле згрижени од роднини или сместени во државни геријатриски установи.
