Се уште се трага по исчезнати лица по минатонеделните разорни поплави, а според официјалните податоци загинале повеќе од 20 лица.
Познатиот босански фотограф Џенад Џино го снимил процесот на чистење на теренот и куќите во Доња Јабланица и Злата, населени места во општина Јабланица.
„Децата на Босна и Херцеговина денеска доброволно се пријавија да ги исчистат терените и куќите во Доња Јабланица, Злата... Благодарам“, напиша Џенад.
Неговото емотивно видео трогна многумина. „Оваа Босна ја сакаме“, „Овие деца се надежта на земјата“, „Кога ќе се спојат малите раце“, „Нашата убава младост“, „Браво златни деца“, се дел од коментарите.
Многу луѓе се вклучија во помошта на погодените места од поплавата, а меѓу нив имаше и млади луѓе од сите делови на Босна и Херцеговина. Туристичката агенција Студентски Походи го организираше чистењето и ги повика младите да одговорат.
„Сите можете да одите без разлика на силата, опремата, подготвеноста затоа што има различни работни места, од работа во магацин и натрупување храна и облека до копање на терен. Луѓето чии домови беа оштетени во поплавите се без сила и им треба повеќе помош од кога било“, објавија пред неколку дена на Инстаграм.
Да потсетиме, Џенад Џино за време на поплавите се огласи на социјалните мрежи за состојбата во Јабланица. Во коментарите под неговата објава контактирал добар човек од Мостар кој им понудил сместување на погодените од поплавите.
„Пријателе, имам празен стан во Мостар, те молам да избереш семејство со деца на кои барем за неколку дена им треба сместување, но немаат никој. Знам дека сега е тешко, но приоритет е дали се деца, можеби и за децата да се смират, хотелот Еро е празен.“
