Британскиот министер за европски прашања Лео Докерти во денешниот разговор со српските власти во Белград најостро ги осуди нападите врз косовската полиција во близина на манастирот Бањска и ги повика властите во Белград и Приштина да работат заедно за да ги изведат сторителите пред лицето на правдата.
„Обединетото Кралство и натаму поттикнува конструктивно однесување во дијалогот меѓу Србија и Косово, како клуч за регионалната стабилност и безбедност. Силно го осудуваме насилниот напад врз косовската полиција на 24 септември и ги повикуваме властите во Белград и Приштина да работат заедно да ги изведат сторителите пред лицето на правдата“, рече Докерти, пренесе британската амбасада во Белград.
Докерти го посети Белград во рамките на регионалната турнеја низ Западен Балкан, а разговараше со српскиот министер за надворешни работи Ивица Дачиќ и министерката за евроинтеграции Тања Мишчевиќ, како и со претставници на парламентот.
„Настаните од 24 септември претставуваат реални ризици за регионалната стабилност. Тие произлегуваат од неконтролираното акумулирање оружје и неуспехот да се постигне напредок во нормализацијата на односите меѓу Србија и Косово, чија цел е сите заедници да се чувствуваат безбедни и сигурни“, рече Докерти.
Тој ја повика Србија целосно да соработува со косовските власти и меѓународните партнери со цел да се изведат одговорните пред лицето на правдата, како и да го искористи своето влијание на северот на Косово со цел да ги деескалира тензиите и да го обесхрабри понатамошното насилство, како и да се воздржат од какви било потези или реторика кои би го отежнале враќањето на дијалогот под покровителство на Европската Унија.
„Обединетото Кралство ги охрабрува Србија и Косово да се однесуваат одговорно и итно и со добра волја да се вратат на процесот на дијалог спонзориран од ЕУ“, се додава во соопштението.
фото: Британска Влада
