Инцидентот предизвика шок и негодување кај пратениците и покрена прашања за безбедноста и етиката на парламентарните процедури, пишува списанието Феникс.
Гласањето беше за претставници во таканаречениот Оберрајнрат, односно меѓурегионален совет кој ги обединува политичките претставници од германскиот, францускиот и швајцарскиот регион. Кој го нацртал забранетиот симбол сè уште не е познато бидејќи станува збор за тајно гласање.
„Ова е срам за парламентот“
Претседателката на Ландтагот, Мухтерем Арас од Зелената партија, остро го осуди инцидентот. „Ова е под секое ниво. Тоа е срам за овој парламент“, рече Арас, додавајќи дека тоа е кривично дело бидејќи ваквите симболи се забранети со уставот во Германија.
Таа, исто така, забележа дека не било можно да се идентификува сторителот бидејќи гласањето било тајно. Десничарската партија АфД, која ги имаше своите кандидати на гласачкото ливче, веднаш се огласи и се дистанцира од инцидентот. „Категорично отфрламе каква било поврзаност со овој чин“, рече Мигел Клаус, пратеник на АфД. Тој, исто така, ја критикуваше претседателката Арас, тврдејќи дека таа „сугестивно имплицирала“ дека неговата партија е вмешана во инцидентот со кукаст крст.
Од друга страна, СПД реагираше уште поостро. Парламентарниот секретар Саша Биндер побара одговорност. „Кој и да го сторил ова не е достоен за оваа позиција и треба веднаш да ја напушти функцијата. Ова е апсолутно одвратно“, рече Биндер.
