Барањето за отворање истрага беше денека поднесено од Киев до управното тело на организацијата. Ова доаѓа откако германските и холандските разузнавачки агенции во петокот изјавија дека имаат докази за широка употреба на забрането оружје од страна на Русија.
ОПЦВ формираше тим во 2018 година за да ги истражи наводите за употреба на хемиско оружје во Сирија. Тимот за истрага и идентификација изјави дека сириските владини сили и милитантите на Исламска држава користеле забрането хемиско оружје за време на граѓанската војна што започна во март 2011 година.
САД прво ја обвинија Русија во мај за употреба на хлоропикрин, хемикалија која е потоксична од средствата за контрола на немири и првпат ја користеше Германија во Првата светска војна.
ОПЦВ е агенција за разоружување со 193 земји со седиште во Хаг и минатата година изјави дека обвинувањата за употреба на хемиско оружје разменети меѓу Русија и Украина се „недоволно основани“.
Двете страни негираат дека користеле хемиско оружје во конфликтот, кој ескалираше откако започна руската инвазија во февруари 2022 година.
-Украина со ова бара од генералниот директор на ОПЦВ да преземе чекори за воспоставување независен и непристрасен механизам за истрага на случаи на наводна употреба на хемиско оружје во Украина, се вели во украинското барање.
Се бара на механизмот да му се даде овластување да „собира дополнителни докази и да ги идентификува сторителите, организаторите и спонзорите на таквата употреба“.
Документот беше поднесен на почетокот на четиридневниот состанок зад затворени врати на Управниот совет на ОПЦВ, составен од 41 земја. Организацијата сè уште не го коментираше барањето.
-Најмалку три смртни случаи во Украина се поврзани со употребата на хемиско оружје, соопшти холандското воено разузнавање, а украинските здравствени власти соопштија дека повеќе од 2.500 лица повредени на бојното поле пријавиле симптоми поврзани со хемиско оружје.
Велика Британија вчера воведе санкции врз двајца руски поединци и еден субјект под нејзиниот режим на санкции за хемиско оружје, како дел од нејзините најнови напори да ја казни Москва за нејзината војна во Украина.
