Полицијата соопшти дека во главниот град Лусака ги уапсила Јастен Мабулесе Кандунде и Леонард Фири.
„Нивната наводна мисија беше да користат магија за да му наштетат на претседателот Хакаинде Хичилема“, се вели во полициското соопштение.
Многу луѓе во таа јужноафриканска земја веруваат во - и живеат во страв од - вештерство. Полицијата соопшти дека Кандунде и Фири биле регрутирани од Нелсон Банда, помладиот брат на пратеникот Емануел „Џеј Џеј“ Банда.
Пратеникот наводно бил уапсен минатиот месец во соседно Зимбабве под обвинение за грабеж, што тој го негирал, но не бил виден во јавноста. Пратеникот е обвинет и за бегство од притвор во август додека чекал на судење.
Опозициската партија Патриотски фронт (ПФ), предводена од поранешниот претседател Едгар Лунгу, претходно тврдеше дека наводите се политички мотивирани.
Емануел Банда, кој е независен пратеник од 2021 година, претходно бил поврзуван со Лунгу, кој загубил на изборите таа година од Хичилема.
Полицијата во своето соопштение наведува дека помладиот брат на пратеникот Нелсон „моментално е во бегство“. Кандунде и Фири се обвинети според Законот за вештерство во Замбија за „поседување магија“, „исповедање познавање на вештерството“ и „суровост кон дивите животни“. Кај нив биле пронајдени „разни вештерства“, вклучително и жив камелеон, додаде полицијата.
Тие ѝ кажале на полицијата дека им биле ветени повеќе од 2 милиони замбиски квачи (околу 75.000 евра) за нивната „мисија“, се вели во соопштението на полицијата.
На осомничените им е одреден притвор и наскоро ќе се појават пред суд, соопштија од полицијата, но не го прецизираа точниот датум на рочиштето. Тие се уште јавно не се изјасниле за овие наводи.
