Според турското Министерство за внатрешни работи, привремено се отстранети градоначалниците на истанбулските општини Авџилар, Бјујукчекмеџе и Газиосманпаша, како и на општините Џејхан и Сејхан во јужниот округ Адана.
Петтемина се уапсени вчера под обвиненија за „примање мито“ и „изнуда“, во рамките на истраги што ги води Главното обвинителство на Истанбул.
Со оваа нова серија апсења, бројот на приведени градоначалници од редовите на НРП во Истанбул се искачи на девет, вклучително и градоначалникот на Истанбул, Екрем Имамоглу, јавува „Дејли Сабах“. Со двајцата уапсени во Адана, вкупниот број на приведени градоначалници од НРП се зголеми на 11.
Апсењето и притворањето на Имамоглу на 19 март предизвика масовни протести низ Турција, потсетува весникот. НРП го кандидираше Имамоглу за претседателските избори во 2028 година, но неговото учество ќе зависи од исходот на повеќе судски процеси и истраги што се водат против него.
