Најновиот инцидент се случи вчера, во услови на нагло зголемување на нападите со експлозивни направи во земјата во текот на изминатите две недели, соопшти агенцијата.
Колумбиската војска соопшти дека беспилотни летала опремени со експлозивни направи биле насочени кон воени објекти во Санта Роса, лоцирани во јужниот департман Боливар, во Карипскиот регион.
Во нападот, кој војската го опиша како „терористички“, загинаа тројца припадници на вооружените сили, тешко беа ранети 16, а 31 друг беше повреден.
„Тероризмот нема да нè скрши“, напиша колумбискиот претседател Абелардо де ла Есприоља на платформата X, осудувајќи го насилниот чин на оние кои се обидуваат да го „доведат во прашање авторитетот на државата“.
Тој додаде дека наредил потрага по сторителите на нападот и нивно апсење, како и повторно воспоставување контрола врз териториите.
Министерството за одбрана го осуди нападот и изјави дека војниците го обезбедуваат подрачјето, а сообраќајот е обновен неколку часа подоцна.
Властите сè уште не ја припишале одговорноста за нападот на која било конкретна нелегална вооружена група.
Според Канцеларијата на народниот правобранител, неколку нерегуларни вооружени групи се активни во областа, борејќи се за контрола на територијата за трговија со дрога, нелегално рударство и изнуда.
Меѓу нив се „Гајтанистичките сили за самоодбрана“ и герилската група „Националноослободителна армија“ (ЕЛН), која е во вооружен конфликт од 1964 година.
Претходно, друг напад со беспилотни летала наполнети со експлозиви беше извршен во близина на наплатна рампа на Панамериканскиот автопат во Кали, но во тој инцидент немаше повредени.
Ескалацијата на насилството во Колумбија трае веќе две недели, потсетува АП.
Во неделата, во напад врз воена база во Планадас, во јужна Колумбија, загинаа четворица цивили, вклучувајќи и едно двомесечно бебе.
Истиот ден, во напад со мотоцикл полн со експлозиви во југозападната покраина Уила загина еден полицаец, а шест лица беа повредени.
Според властите, насилните дејствија на нелегалните вооружени групи се одговор на мерките преземени од колумбиската влада како дел од нејзината нова безбедносна стратегија.
