Поранешниот американски претседател и републикански кандидат на претстојните претседателски избори, Доналд Трамп, повика на 25-от амандман на Уставот за да се дозволи смена на потпретседателката на САД Камала Харис, која „лаже или учествува во заговор за прикривање на неспособноста на претседателот“ на САД, Џозеф Бајден.
„Ако го направите тоа, прикривајќи го претседателот на Соединетите Американски Држави, тоа е основа за итен импичмент и смена од функцијата, бидејќи тие го направија тоа“, рече Трамп за време на предизборниот митинг во Мосине, Висконсин, пренесе Си-Ен-Ен.
По лошиот настап на Бајден во предизборната дебата во јуни и неговата одлука да ја заврши претседателската кампања еден месец подоцна, Трамп и неговите републикански сојузници ја обвинија потпретседателката Камала Харис и високите демократи дека го прикриваат менталниот пад на претседателот, објави Си-Ен-Ен.
Тимот на кампањата на Камала Харис одби да ја коментира изјавата на Трамп.
Американската потпретседателка продолжи да го брани Бајден и неговиот ментален капацитет, велејќи за Си-Ен-Ен минатиот месец дека не жали што инсистирала во неделите по дебатата дека Бајден е способен да отслужи уште еден четиригодишен мандат.
Американскиот 25-ти амандман на Уставот зборува за претседателското наследување и процесот на смена на претседателот, за што ќе биде потребна поддршка од потпретседателот и мнозинството од кабинетот на претседателот.
Си-Ен-Ен наведува дека амандманот не се однесува на принудно смена на потпретседателот.
За ратификација на уставниот амандман потребна е поддршка од три четвртини од американските држави.
