Данскиот превознички гигант „Маерск“ денес ги објави прелиминарните резултати за првиот квартал од 2025 година, во кои наведува дека неговата EBITDA (заработка пред камати, даноци, амортизација и депрецијација) се зголемила за 70 проценти на годишно ниво на 2,71 милијарди долари, но во исто време ја намалила прогнозата за раст на глобалниот пазар за контејнерски транспорт поради тензиите меѓу Кина и Соединетите Американски Држави.
Компанијата сега очекува вкупниот пазар да се намали во 2025 година за еден до четири проценти, додека претходно предвидуваше раст од четири проценти, објави CNBC.
Извршниот директор на „Маерск“, Винсент Клерк, изјави дека резултатите од првиот квартал се во голема мера резултат на силниот пазар и робусната глобална економија во текот на 2024 година, но во исто време нагласи дека тензиите меѓу САД и Кина предизвикале значителен пад на обемот на трговија меѓу двете земји, за 30 до 40 проценти во април.
Компанијата, која експертите често ја сметаат за барометар на глобалната трговија, верува дека сегашната ситуација е тешко да се одржи на долг рок.
- Доколку не најдеме решение, сегашното ниво на царини е едноставно превисоко за какво било закрепнување. Очигледно е дека сè уште има многу нестабилност пред нас“, рече Клерк.
„Маерск“ исто така објави дека проблемите во Црвеното Море би можеле да траат во текот на целата година, дополнително влијаејќи на глобалните транспортни текови.
Акциите на „Маерск“ паднаа за 2,5 проценти по објавувањето на резултатите, што укажува на претпазливост на пазарот во врска со прекумерната геополитичка неизвесност.
